ღვინის დაგემოვნების ხელოვნება

ალბათ ბევრისთვის ნაცნობია იმედგაცრუების შეგრძნება, როდესაც სადილზე მორთმეული ძალიან გემრიელი კერძისა და არცთუ ურიგო ღვინისგან სიამოვნებას ვერ იღებ. უსიამოვნო შთაბეჭდილების მიზეზი ძალიან უბრალოა – ზოგიერთი ღვინო სრულიად ფარავს ან აფუჭებს კერძის გემოს. ამასთან, ამ უკანასკნელსაც ასეთივე წარმატებით შეუძლია დააკნინოს ყველაზე კეთილშობილი სასმლის გემური თუ არომატული თვისებები. აქედან გამომდინარე, ღვინისა და კერძის დაწყვილება მთელი ხელოვნებაა, თუმცა არც ისე რთული, როგორც ეს ხშირად ჰგონიათ ხოლმე.

ღვინისა და კერძის შეხამების დროს, ერთ-ერთი მთავარი მომენტი იმაში მდგომარეობს, რომ არცერთმა არ უნდა გადაფაროს ერთმანეთის გემო. თუ დომინანტის განსაზღვრა შესაძლებელია, უკვე ცხადი ხდება, რომ დაწყვილების დროს შეცდომა იქნა დაშვებული. არის შედარებით უარესი მომენტებიც, როდესაც ღვინისა და კერძის სინთეზი უსიამოვნო გემურ შეგრძნებებს წარმოშობს, ან ერთ-ერთის თვისებები სრულიად იკარგება. ამ ორი კომპონენტის შეხამება წარმატებულად მხოლოდ მაშინ შეიძლება მივიჩნიოთ, როდესაც ღვინო ხაზს უსვამს კერძის მთავარ ღირსებებს ან, უკეთეს შემთხვევაში, აძლიერებს მათ.

თუ ღვინოში ცოტათი მაინც ერკვევით, მაშინ კერძებთან მისი დაწყვილება ძალიან რთულ ამოცანას არ წარმოადგენს, იქიდან გამომდინარე, რომ მთავარი აქსიომა საკმაოდ უბრალოა. მთავარია, მსუბუქ კერძებს მსუბუქი, ხალისიანი ღვინოები შევუხამოთ, მძიმე, ცხიმიან საკვებს კი – მძიმე, სხეულიანი, მაგარი ღვინოები. პიკანტური გემოს კერძებთან კი ურიგო არ იქნება ასევე სუნელებიანი ბუკეტის მქონე ღვინის შერჩევა.

პოსტის წაკითხვა 5457